Wasiirka wasaaradda Amniga iyo ku xigeenkiisa oo ay wehliyaan wasiirro iyo Xildhibaanno ka tirsan dawlad goboleedka Galmudug, maamulka degmada Dhabbad iyo odayaal ka kala socday Caabudwaaq iyo Dhabbad ayaa maantay ka dhagax dhigay xeradii 4-aad ee tababarka ciidamada Daraawiishta Galmudug duleedka magaalada Dhabbad.
Guddoomiyaha degmada Dhabbad, xildhibaanno iyo Wasiiro goobta dhagaxdhigga ka hadlay ayaa bogaadiyey isla markaana soo dhoweeyey tallaabada wasaaradda Amnigu ay maantay ku dhagaxdhigtay dugsiga tabababarka Daraawiishta Galmduug ee 4-aad, taasoo ay ku tilmaameen horumar u soo hoyday dadka reer Galmudug.
Wasiirka Amniga ayaa dhankiisa sheegay in siyaasadda wasaaraddiisu ay tahay in la xareeyo dhammaan maleeshiyaadka ku sugan Galmudug iyo gaadiidkooda dagaalka, loona furo xeryo tababar, kuwa tababaradaas dhammaystana ay ka mid noqon doonaan ciidamada rasmiga ah ee Daraawiishta Galmudug, sidaas awgeed wasiirku wuxuu sheegay in labada todobaad ee soo socda la soo xareeyo ciidamadii tababarku u furmi lahaa.
