Wasaaradda Boostada, Isgaarsiinta & Teknolojiyada Soomaaliya oo hishiis kaalmo farsamo lagaartay Ururka Boostada Adduunka..

Wasaaradda Boostada, Isgaarsiinta & Teknolojiyada ayaa heshiis kaalmo farsamo la saxiixatay Ururka Boostada Adduunka (UPU), kaas oo dalka ka caawin doono qaabka ugu habboon ee dib loogu soo nooleyn karo adeegga boostada.

labada dhinac waxay kala saxiixden hishiis waxaana u kala saxiixay  Wasiirka Boostada, Eng Cabdi Cashuur Xasan iyo Agaasimaha Guud ee UPU, Danjire Bishaar C/raxmaan Xuseen, waxaana goobjoog ka ahaa madax ka kala socotay labada dhinac oo uu ka mid yahay wasiiru-dawlaha Wasaaradda.

Mashruuca koowaad ayaa la sheegay in qiimihiisu noqon doona 60kun oo doolar oo loogu talo galay helitaanka khubaro ka socota UPU oo qiimeyn ku sameysa baahida jirta iyo qorshaha wax looga qaban karo, dajinta siyaasadaha lagu hagi doono adeegga boostada, tababarka kaadirkii ka shaqeyn lahaa boostada iyo helitaanka barnaamijyada teknolojiadeed ee lagu shaqeeyo si loo billaabo adeegyada aasaasiga ah ee boostada.

Danjire Bishaar oo ka hadlay munaasabadda saxiixa ayaa sheegay in mashruucan uu la mid yahay ‘dhibic ku dhacday badweyn’ marka loo eego baahida ballaaran ee ay qabto boostada Soomaaliya

“Maadaama aad wax walba meel eber ah ka soo billaabeysaan waxaad haysataan fursad aad ka billaabi kartaan meesha ay mareyso boostada adduunka maanta oo adeegsataan farsamada casriga ah. UPU waxay diyaar u tahay inay idinka caawiso sidii aad himiladaas u gaari lahaydeen,” ayuu yiri Bishaar.

Wasiir Cabdi Cashuur ayaa ugu dambeyntii u mahadceliyay Danjire Bishaar iyo madaxda waaxyaha kala duwan ee UPU sida degdegta leh ee ay uga jawaabeen baaqii Soomaaliya.

“Mashruucan waa tallaabo wanaagsan, laakiin anaga waxaa wax kasta nooga qiimo badan soo-dhoweyntii diirraneyd ee aan la kulannay UPU,” ayuu yiri wasiir Cashuur oo intaasi ku daray. “Taageerada farsamo ee nala siiyay waxay naga caawineysaa sidii aan ku dhisi lahayn aasaaska boosto la jaan-qaadi karta meesha ay boostadu maanta mareyso,” ayuu hadalkiisa ku soo gabagabeeyay wasiirku.