Guddiga u diyaar-garawga iyo ka hortaga xanuunka Coronavirus ee maamulka Somaliland oo maanta shir jaraa’id ku qabtay magaalada Hargayso ayaa ku dhawaaqay in deeganada maamulkaasi laga joojiyay keenista iyo ka ganacsiga Qaadka.
Madaxweyne ku xigeenka maamulka Somaliland, Cabdiraxmaan Cabdilaahi Ismaaciil (Saylici) ahna gudoomiyaha guddida u diyaar-garawga iyo ka hortaga xanuunka Coronavirus oo ay wehelinayaan xubnaha guddidaasi iyo masuuliyiin kala duwani ayaa warbaahinta ugu warbixiyay amarkaani cusub ee lagu soo rogay deganada Somaliland waxaa uuna sheegay in ilaa 25 maalmood aan wax qaad ah la keeni karin Somaliland.
Madaxweyna Ku xigeenka ayaa sidoo kale Sheegay in amar kaani oo socon doona ilaa maalinta Salaasada ee taariikhdu tahay 21st May 2020 oo ku beegan labo cisho ka hor maalinta ciidda ay ku xisaabtami doonaan xaaladda isbedel ee xanuunka COVID-19.
Sidoo kale madaxweyne Ku xigeenka maamulka Somaliland Cabdiraxmaan Cabdilaahi Ismaaciil (Saylici) ayaa amar ku siiyay maamulada deeganada Somaliland iyo hay’addaha amaanka in ay gacanta kusoo dhigaan cid kasto oo isku dayda in ay si sharciga baal marsan ku soo galiyaan qaadka waxaa uuna intaasi ku daray in gawaarida lagu soo qabta iyagoo sida qaad lagu dari doona gawaarida maamulkaasi Somaliland.
