Madaxweynaha dowlada Federaalka Soomaaliya Maxamed Cabdullaahi Farmaajo ayaa ka qayb galay xuska sannad-guurada 59-aad ee Xorriyadda Gobollada Waqooyi ee dalka.
Madaxweynaha oo khudbad ka jeediyay munaasabadda ayaa ka hadlay muhiimadda maalinta 26-ka Juun u leedahay shacabka Soomaaliyeed maadaama ay ahayd maalintii koowaad oo calan soomaaliyeed laga taago dhul Soomaaliyeed oo xor ah.
“Halgankii guumaysi diidka iyo Soomaalinnimadu waxa uu ahaa mid ka soo bilawday Gobollada Waqooyi. Waa kuwii awooddooda iyo hal-abuurkooda u isticmaalay baahinta iyo faafinta dareenka waddaniyadeed ee Soomaali oo qura, Soomaali oo qab leh, Soomaali ku wada nool hal dawlad iyo hal calan.” Ayuu yiri Madaxweyne Farmaajo.
Madaxweynaha oo sii wata khudbadiisa yaa shacabka Soomaaliyeed kula dardaarmay in ay ka shaqeeyaan midnimadooda si horumar looga oo jiilka soo koraaayo u helaan fursada aysan helin kuwii ayaga ka horeeyay.
“Haddii marka dadka Waqooyi hormuud u ahaayeen dareenka gobonnimo doonka iyo waddaniyadda, waxaan hadda ugu baaqayaa inay hormuud ka noqdaan midnimada iyo wadajirka dalka Soomaaliya si aan caqligeenna, cududdeenna iyo hadafkeenna u midayno, ugana shaqayno mustaqbalka ubadkeenna iyo maslaxadda dalkeenna iyo dadkeenna.” Ayuu yiri madaxweynaha dalka.
Munaasabaddan waxaa sidoo kale ka qaybgalay Guddoomiyaha Aqalka Sare Cabdi Xaashi Cabdullaahi, Guddoomiyaha Maxkamadda Sare Baashe Yuusuf Axmed, Guddoomiyaha Gobolka Banaadir ahna Duqa Muqdisho Cabdiraxmaan Cumar Cusmaan (Eng. Yariisow), Wasiirka Warfaafinta ahna Guddoomiyaha Guddiga Qabanqaabada Maxamed Cabdi Xayir Maareeye, xubno ka tirsan Golayaasha Dowladda, Taliyayaasha Ciidamada Qalabka Sida, Diblumaasiyiin iyo qaybaha kala duwan ee bulshada.
