Guddoomiyaha cusub ee Degmada Marka , C/llaahi Cali Axmed (Waafoow), ayaa sheegay in waxyaabaha ugu horreeya ee uu qaadi doono ay tahay sidii Al-Shabaab looga xoreyn lahaa degaannada ay kaga harsan yihiin Gobolka, ammaankana loo soo celin lahaa.
Waafoow, oo Warbaahinta lahadlay ayaa ku cel-celiyay in qorshihiisa koobaad iyo kan Labaadba uu yahay sugidda ammaanka, isagoo Shacabka iyo qeybaha kala duwan ee Bulshada ka codsadey in ay maamulkooda la shaqeeyaan.
Guddoomiye, Waafoow ayaa sheegay in ay xoogga saari doonaan sidii dib loogu soo celin lahaa dhammaan adeegyadii Bulshada ee Degmada Marko, sida Caafimaadka, wax-barashada iyo dhaq-dhaqaaqyadii kale ee Bulshada iyagoo kaashana maamulka Koofur Galbeed iyo laamaha ammaanka.
Wuxuu sheegay Guddoomiyuhu in ay sidoo kale xoogga saari doonaan horumarinta degaanka, haatanna ay kulammo la qaateen hay’adaha ay quseyso, Shacabkuna ay u jiheyn doonaan in ay ka faa’iideystaan Kheyraadka uu Alle ku manneystay, maaddaama ay Degmada Marka tahay Magaalo Xeebeed, balse intaas oo idil ay ka horreeyso sugidda ammmaanka.
C/llaahi Cali Axmed (Waafoow), ayaa sheegay in aysan jirin haba yaraatee wax adeeg Caafimaad ah oo uu fuliyo Isbitaalka Guud ee Magaalada Marka, Shacabkuna ay arrintaasi dhibaato weyn ka haysato, isagoo Dowladda Federaalka iyo maamulka Koonfur Galbeedba ugu baaqay in gar-gaar Caafimaad oo deg-deg ah lala soo gaaro.
Shacabka ku nool Magaalada Marka ayuu ugu baaqay in ay ka gudbaan waxyaabihii dhaliyay colaadihii ragaadiyay Degmada iyo horumrinta degaanka, wuxuuna usoo jeediyay in ay maamulka iyo laamaha ammaankuba kala shaqeeyaan sidii loo Cirib tiri lahaa Kooxda Al-Shabaab.
