Golayaasha Guurtida iyo Wakiilada Somaliland ayaa maanta kulan deg deg ah si wadajir ah kaga yeeshay go’aankii madaxweynaha Somaliland Muuse Biixi Cabdi uu xaaladda deg deg ah ku geliyay degmooyinka Gar-adag Ceel-afweyn iyo Ceerigaabo oo katirsan gobolka Sanaag.
Guddoomiyaha golaha Wakiilada Somaliland Baashe Maxamed Faarax oo shir-guddoominayay kulanka ayaa mudanayaasha ka dalbaday in ay cod u qaadan xeerka uu soo saaray madaxweynuhu ee xaaladda deg deg ah ku geliyay degmooyinka ka tirsan gobolka Sanaag.
Kulanka maanta ay yeesheen Golayaasha Guurtida iyo Wakiilada Somaliland ayaa waxaa kala fadhiga soo xaadiray 107 mudane waxaana cod gacan-taag ah loo qaaday ansixinta xeerka xaaladdda deg deg ah, waxaa ogolaaday 40 xildhibaan oo keliya halka aqlabiyadii kale diideen.
guddoomiyaha golaha Wakiilada Somaliland Baashe Maxamed Faarax ayaa sheegay in tirinta codadka la qalday waxaa uuna codsaday in mar kale dib loogu laabta waxaana arinkaa ka biya diiday qaar kamida Xildhibaannada wixii kadabeeyayna fadhiga ayaa isu rogay buuq iyo sawaxan. guddoomiye Baashe ayaana ku dhawaaqay in kulanku xiranyahay oo maalinta Sabtida la isu imaan doono.
