Waxaa maanta magaalada Dhuusa-mareeb ee casimada Galmudug gaaray Ergayda degmada Ceeldheer ku meteleysa shir-weynaha looga tashanayo aayaha Galmudug waxaana Garoonka Ugaas Nuur kusoo dhaweeyay ergadaas Guddiga qaban-qaabada shir-weynaha dib-u-heshiisiinta Galmudug iyo dhaqanka magaalada Dhuusamareeb.
Nabadoon Cabdullaahi Geedi Shadoor oo hoggaaminayay ergada maanta soo gaartay magaalada madaxda dowlad gobaleedka Galmudug ayaa u mahad celiyay guddiga dib-u-heshiisiinta, Madaxda Galmudug, dowladda federaalka iyo dhamaan inta gacanta ka geysatay dadaallada dib-u-dhiska Galmudug.
Cabdi Maxamed Jaamac (Cabdi Waayeel),Guddomiye ku-xigeenka guddiga dib-u-heshiisiinta Galmudug ayaa uga mahad celiyay ergada Ceeldheer aqbalaadda casuumaadii ay u fidiyeen, ayna usoo diyaar garoobeen ka qayb galka shir-weynaha lagu doonayo in reer Galmudug ay aayahooda uga tashadaan.
Guddomiye ku-xigeenka guddiga ayaa sidoo kale u rajeeyay in ay qaybta uga aadan ka qaadan doonaan shirka dib-u-heshiisiinta ee dhawaan ka furamaya magaaalada Dhuusamareeb ee xarunta dowlad gobaleedka Galmudug si loo laba jibbaaro shaqada balaaran ee horumarka deegaanka lagu baadi goobayo.
