Xiddiga garabka uga ciyaara kooxda chelsea ee Eden Hazard ayaa ku sii dhawaanaya ku biirista kooxda Real Madrid iyada oo la filayo in maalmaha yar ee soo socda lagu dhawaaqo heshiiska xiddigu ugu biiri doono Real Madrid.
Xiddiga reer Belguim ayaa qalinka ku duugi doona heshiis 6 sano ah oo uu ku joogi doono kooxda Real Madrid ilaa xagaaga 2024 isaga oo qaadan doona mushahar waali ah.
Wargayska The Sun ayaa kashifay in uu Eden Hazard jeebka ku shuban doono lacag dhan 16 milyan oo euro sanadkii isaga oo ka mid noqon doona xiddigaha ugu mushaharka badan kooxda.
Hazard oo 100 milyan oo euro ugu biiri doona kooxda Real Madrid ayaa la sheegayaa in uu todobaadkii qaadan doono lacag dhan 350 kun oo Gini marka uu ku biiro kooxda Real Madrid.
28 jirkan ayaa si cad u sheegtay in uu si weyn ugu riyoonayo in uu ku biiro Real Madrid iyada oo ay haatan u dhawdahay in ay Riyadaas u rumawdo wakhtiga soo socoda.
Inkasta oo ay Chelsea ka ganaaxnaan doonto labada suuq ee soo socda hadana Taas ayaan Hazard ka hor istaagi karin in uu ku biiro kooxda Real Madrid dhamaadka xilli ciyaareedkan.
Hazard ayaa Chelsea ku soo biiray xagaagii 2012 isaga oo kaga soo biiray kooxda Lille kuna guulaystay kooxda 5 koob oo kala ah 2 premier League, FA Cup, League Cup iyo Europa League.
