Ra’iisul Wasaaraha dalka oo ka qayb galay kulan loogu mahadnaqaayay madaxda qaraanka oo ku aadan soo xulistooda Guddoomiye Filish.

Ra’iisul Wasaaraha xukuumadda federaalka Soomaaliya Xasan Cali Khayre oo Muqdisho uga qayb galay munaasabad madaxda qaranka looga mahad celiyay xulashadooda duqa cusub ee Muqdisho, ayaa bulshada Soomaaliyeed kula dardaarmay in ay garab istaagaan guddoomiyaha gobalka Banaadir, si uu uga shaqeeyo horumarinta caasimadda dalka.

Xasan Cali Khayre, Ra’iisul Wasaaraha xukuumadda federaalka Soomaaliya ayaa caddeeyay in taageerada iyo la shaqeynta bulshada ee guddoomiye Cumar Maxamuud Maxamed (Filish), ay ka qayb qaadaneyso sugidda amniga iyo horumarinta gobalka Banaadir oo ah astaanta qaranimada iyo xarunta dhaqaalaha iyo ganacsiga dalka.

Ra’iisul Wasaaraha ayaa sheegay in guddoomiye Cumar Maxamuud Maxamed (Filish) loogu aaminay hoggaaminta bulshada caasimadda, si dowladnimadu u xoogeysato, uuna isugu keeno dadka, xaquuqdoodana u ilaaliyo.

Xasan Cali Khayre ayaa ballan qaaday in madaxda qaranku ay guddoomiyaha ku garab istaageyso gudashada mas’uuliyadda culus ee ka saaran horumarinta caasimadda dalka oo ay ku noolyihiin malaayiin Soomaaliyeed oo dhaqan u leh isku heynta bulshada iyo ilaalinta qarannimada.