Ra’iisul Wasaaraha xukuumadda Federaalka Soomaaliya , Xasan Cali Khayre ayaa Maanta dhagax dhigay Hoyga nabadadda Magaalada Gaalkacyo.
Ra’iisul Wasaare Khayre oo dhismaha hoyga nabadda ku tilmaamay sharaf u soo hoyatay Mudug iyo Dadka Soomaaliyeed oo dhan ayaa ku ammaanay maamullada Labada dhinac ee Magaalada Gaalkacyo iyo gobalka Mudug dedaalkooda ku aaddan nabadaynta waxa uuna kula dardaarmay in ay sii laba jibbaaraan si Guriga nabadda Gaalkacyo loo gaarsiiyo guriga nabadda Soomaaliya.
“Gaalkacyo midaysan waa Soomaaliya mideysan, Gaalkcayo nabad ah waa Soomaaliya oo nabad ah”, Ayuu yiri Ra’iisul Wasaare Xasan Cali Khayre.
Munaasabadda Dhagax dhigga oo ay ka qeyb galeen guddoomiyayaasha Gobalka Mudug iyo Gudoomiyayaasha Degmada Gaalkacyo ee Puntland iyo Galmudug iyo Bulshada qeybaheeda kala duwan ayaa ka dhacday qaybta Koonfureed ee magaalada Gaalkacyo.
Hoyga nabadda Gaalkacyo ayaa saldhig u noqnaya Dadka ka shaqeeya nabadda Gaalkacyo, Odayaasha dhaqanka iyo Dadka sama-doonnada ah ee Bulshada isu soo duma, si sare loogu qaado is-dhex galka Bulshada, dib-u-heshiisiinta, loogana shaqeeyo soo celinta sharafta iyo karaamada Ummadda Soomaaliyeed.
