Roobab mahiiggaan ah oo saacado badan da’ayay, ayaa mowjado daadad ah ku soo rogay degaanno ka tirsan gobolka Nugaal.
Degaanno ay ku jiraan Sinujiif, Dangoroyo, Uusgure, Libaaxo, Xaaji Khayr iyo Dalsan, ayaa la soo sheegayaa in ay daadad xooggan ku celiyeen, roobabka gu’ga oo 24-kii saac ee la soo dhaafay ka da’ayay halkaasi.
Ilaa iyo hadda lama oga khasaaraha ka dhashay daadadka ku rogmaday tuulooyinkaasi oo dhammaantood ku yaalla dhulka hoose ee loo yaqaanno “Ayax-geed-gaaban”.
Caasimadda Puntland ee Garoowe, ayaa sidoo kale roobab ay shalay ka da’een ay saameyn ku yeesheen dadka ku nool xeryaha barakacayaasha halkaas oo ay yaalaan meela godan oo biyuhu ku soo rogman karaan.
