Gollaha Wakiiladda dowlad Goboleedka Puntland oo ansixiyay Wasiiru Dowlayaal uu dhawaan soo magacaabay madaxweyne Deni.

Guddoomiyaha Gollaha Wakiiladda dowlad Goboleedka Puntland Abwaan Cabdirashiid Yuusuf Jibriil ayaa maanta  shir gudoomiyay mudo saddex casho oo fasax shaqo ah kadib Fadhiga 16-aad ee Kalfadhiga 45-aad ee Golaha Wakiillada Puntland.

Fadhiga maanta waxaa Golaha Wakiillada hor yimid Wasaaradda Howlaha Guud, Guddiga dhismaha Wadada Ceeldaahir – Ceerigaabo iyo Hay’adda dhismaha Wadooyinka Puntland ee PHA, iyaga oo ka warbixiyey xaalada guud ee Wadooyinka Puntland iyo dhismaha Wadada Ceeldaahir – Ceerigaabo.

Sidoo kale, waxaa Golaha Wakiillada horyimid Wasiiru Dowlayaal iyo Wasiir ku xigeeno dhawaan uu soo magacaabay Madaxweynaha dowlad goboleedka Puntland si ay Golaha Wakiillada uga helaan xasaanad siin.

Masuuliyiintaan oo isugu jiray Wasiiru-Dowlaha Wasaaradda Dekedaha iyo Gaadiidka Badda, Wasiiru-Dowlaha Wasaaradda Xanaanada Xoolaha, Wasiiru-Dowlaha Wasaaradda Shaqada, Shaqaalaha, Dhallinyarada iyo Ciyaaraha, Wasiir ku-xigeenka Wasaaradda Waxbarashada iyo Tacliinta Sare, Wasiir ku-xigeenka Wasaaradda Duulista Hawada iyo Garoomada iyo Wasiiru Dowlaha Wasaaradda Warfaafinta ayaa Golaha Wakiillada ugu warbixiyay taariikh nololeedkooda oo kooban.

Ugu dambeyn waxaa Goluhu cod gacan taag ah ugu codeeyey Wasiiru Dowlayaasha iyo Wasiir ku-xigeenada, iyada oo ay ansixiyeen 42 Xildhibaan oo maantay fadhiga Golaha soo xaadiray, cid diiday ma jirin, cid ka aamustayna ma jirin, sidaas ayeeyna xasaanad ku heleen.