Guddiga dib u-eegista dastuurka ee labada gole ee Baarlamaanka dalka ayaa maanta horgeeyay fadhiga wadajirka ah ee Baarlamaanka habraac ansixinta qaraarka dastuurka KMG ah oo ka koobnaa 11 qodob waxaana sharaxay guddoomiyaha guddiga xildhibaan Cabdi Xasan Cawaale (Qeybdiid).
Cabdi Xasan Cawaale Qeybdiid guddoomiyaha guddiga dib u-eegista dastuurka KMG ayaa ugu horeyn golaha ugu warbixiyay baahida loo qabo dastur dhamaystiran isagoo dhanka kale ka hadlay caqabada sida uu sheegay intii ay howshaan ku gudajireen hortaagnaa.
Caqabadaha uu Guddoomiyaha Guddiga dib u-eegista dastuurka GKM sheegay ayaa isugu jiray kuwa dhaqaale, siyaasadeed iyo kuwa farsamo intaba balse waxaa uu si gaar ah ugu nuux nuuxsaday ilaa shan caqabadaha ugu weyn ee hortaagnaa.
1: Isfahan waagga siyaasadeed ee dhexyaallo madaxda dowlada federaalka iyo kuwa dowlad goboleedyada ayuu ku sheegay in ay kamid tahay caqabada koowaad ee hortaagan.
2: latashi la’aanta dastuurka ee Bulshada Soomaaliyeed oo loo baahnaa in lawada gaarsiiyo.
3: Arrimaha maaliyadeed ee loo baahnaa in lagu gaarsiiyo dastuurka in uu ku howlgallo.
4: Muddo xilleedka Baarlamaanka 10-aad oo gaba-gaba ah iyo shaqada la rabbo in la qabto oo ah mid aah is dabooleyn.
5: caqabada shanaad ee uu guddoomiyaha sheegay in ay hortaagneed guddiga iyo shaqada ayuu ku sheegay mida aheyd khilaafkii ka dhexjiray labada aqal ee Baarlamaanka Jamhuuriyadda federaalka Soomaaliya.
Guddoomiyaha ayaa mudanayaasha labada Aqal ka codsaday in ay isku howlaan sidii ay ku ansixin lahaayeen dasturka si looga baxo kumeel gaarnimada iyo in lahelo doorasha iyo nidaam hufan.
Ugu danbeyn Xildhibaan Burhaan Aadan Cabdi ayaa mudanayaasha labada Aqal ee Baarlamaanka Jamhuuriyadda Federaalka Soomaaliya ka hor-jeediyay Habraaca Ansixinta Dib u Eegista Dastuurka.
